ၸဝ်ႈသြႃႇလူင် ရႃၸိၼ်တ (ဢၵ်ႉၵမႁႃႇပၼ်တိတ)၊ ႁူဝ်ပဝ်ႈလူင်မၢႆ (4)၊ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး၊ ၵျွင်းလူင်မိူင်းၼၢင်း ဝဵင်းၵေးသီး
သြႃႇၸဝ်ႈၼႆႉ ၵိူတ်ႇမႃး မိူဝ်ႈပီၵေႃးၸႃႇ 1293 ၼီႈ လိူၼ် 8 တုတိယမႂ်ႇ 7 ၶမ်ႈ ဝၼ်းပုတ်ႉ တီႈဝၢၼ်ႈလူင် မိူင်းၼၢင်း တူင်ႇဝဵင်းၵေးသီး၊ ပေႃႈမႄႈၸဝ်ႈ ၸိုဝ်ႈဝႃႈ လုင်းသေႃးပီႇတ+ပႃႈႁိူင်းၵျႃႇ၊ ၸိုဝ်ႈမိူဝ်ႈလဵၵ်ႉႁွင်ႉဝႃႈ ၸၢႆးလႃႉ။
မၼ်းၸဝ်ႈ ပဵၼ်သၢင်ႇ မိူဝ်ႈပီ 1304 ၼီႈ၊ ပဵၼ်ၸၢင်း မိူဝ်ႈ1321 ၼီႈ ၊ ယၢမ်းသွၼ်ႁဵၼ်းမႃးတီႈ ၵျွင်းလူင်မိူင်းၼၢင်း၊ ဝဵင်းတႃႈလိူဝ်ႇသေ ပီ 1322 ၼီႈၼၼ်ႉ ဢွင်ႇၸၼ်ႉၶူးသွၼ် သႃႇသၼထၸသိရီပဝရ ထမ်ႇမႃၸရိယ၊ ဝၢႆးဢွင်ႇၸၼ်ႉၶူးယဝ်ႉ ၵႂႃႇၸွႆႈထတ်းပိတၵၢတ်ႈတႆး တႄႇလိူၼ် 12 တေႃႇ လိူၼ် 4 ၊ ပီ 1324 ၼီႈ မႃးၶိုၼ်းတီႈၵျွင်းလူင်မိူင်းၼၢင်းသေ သွၼ်ပၼ်လိၵ်ႈ၊ ဢွၼ်ႁူဝ်ႁဵတ်းပဵၼ်ပၢင် ပွႆးၶူၼ်ႉၶႆႈ တႅမ်ႈတွပ်ႇ လိၵ်ႈၵူႈပီပီယဝ်ႉ။
မိူဝ်ႈပီ 1350-ၼီႈ လႆႈပဵၼ် ၽူႈၶဝ်ႈၸုမ်းၽၢႆႇႁၢပ်ႇၵၢၼ် ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈမိူင်း လႄႈ ၽူႈတတ်းသိၼ်ၽၢႆႇသင်ႇၶၸိုင်ႈမိူင်း၊ ပီ 1352-ၼီႈ လႆႈဢၵ်ႉၵမႁႃႇပၼ်ႇတိတ လႆႈပဵၼ်ႁူဝ်ပဝ်ႈ လူင် ငဝ်ႈငုၼ်းမုၵ်ႉၸုမ်းလူင် သင်ႇၶၸိုင်ႈတႆးယဝ်ႉ။
ၸဝ်ႈသြႃႇလူင်ႁဝ်းၼႆႉ လႆႈႁပ်ႉမိူင်းၾႃႉ ယႃႇမိူင်းလုမ်ႈ မိူဝ်ႈပီ 1358 ၼီႈ လိူၼ်ႁူၵ်းလွင်ႈ 14 ၶမ်ႈ ဝၼ်းပုတ်ႉ ယၢမ်းၵၢင်ၼႂ် 11:15 တီႈႁူင်းယႃသင်ႇၶ ဝဵင်းၵေးသီးၼၼ်ႉယဝ်ႉ။
ပပ်ႉမၼ်းၸဝ်ႈတႅမ်ႈဢွၵ်ႇဝႆႉ
- ၾိင်ႈငႄႈပုတ်ႉထ
- ၸၼ်ႉသွၼ်ဢၽိထမ်ႇမႃႇ
- သၢင်ႇတိုဝ်းၵမ်ထမ်/တွပ်ႇ
- ပႃႇတိမွၵ်ႈၽၢႆႇတႆး
- သၢင်းၵျူဝ်ႇၽၢႆႇတႆး
- သတ်ႉတႃႇၽၢႆႇတႆး
- မိလိၼ်ႇတထၢမ်/တွပ်ႇ မၢႆ-1
- ၵမ်ႇမဝႃႇၸႃႇ. 9 တွၼ်ႈ
- သံယုတ်ႉတၼိၵႃႇယ ၽၢႆႇတႆး
- ႁိတေႃးပတေႇသ
- ၸဝ်ႈမႁေႃႇသထႃႇ
- ၵႃႇလီႇတႃႇသ
- ပိုၼ်းၼၢင်းသုၼၼ်ႇတႃႇရီႇ
- မိလိၼ်ႇတထၢမ်/တွပ်ႇ မၢႆ-2
- ထမ်မပတ
- ဢင်ႇၵုတ်ႉတရၼိၵႃႇယၽၢႆႇတႆး