ၸဝ်ႈသြႃႇရေဝတ (ထမ်ႇမၵထိၵ) ၵမ်ႉႁူဝ်ပဝ်ႈ ငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈတႆး ဝတ်ႉမူၺ်ႇတေႃႇ ဝဵင်းမိူင်းၵိုင်

ၸဝ်ႈသြႃႇရေဝတၼႆႉ ၵိူတ်ႇမႃးမိူဝ်ႈပီ 1305 ၼီႈ၊ လိူၼ်ၸဵင်မႂ်ႇ 5 ၶမ်ႈ၊ ဝၼ်းပုတ်ႉ၊ ပွၵ်ႉၵၢင်ဝဵင်း၊ ဝဵင်းမိူင်းၵိုင်။ ၸိုဝ်ႈပေႃႈမႄႈႁွင်ႉဝႃႈ လုင်းၵျွင်းမွင်ႇ+ပႃႈၵျွင်းၺုၼ်ႉ။

မိူဝ်ႈဢႃႇယုလႆႈ 6 ၶူပ်ႇၼၼ်ႉ ယူႇၵျွင်းၸၼ်ႉၵၢင် လူင်ပွင်ၸိုင်ႈ မိူင်းၵိုင်။ ဝၢႆးၼၼ်ႉ ၶၢႆႉၵႂႃႇႁူင်းႁဵၼ်း ၶရိတ်ႉယၢၼ်ႇၸၼ်ႉသုင် ဝဵင်းတွင်ႇၵျီးသေ ၽႅဝ်ထိုင်ၸၼ်ႉၵဝ်ႈ။ ပဵၼ်လုၵ်ႈႁဵၼ်းၵဝ်ႇ H.S.F ၵျွင်းၸၼ်ႉသုင်ယဝ်ႉ။

ပီ 1325 ၼီႈ ၶိုၼ်ႈပဵၼ်ၸၢင်း တီႈၼႂ်းသိမ်ႉၶၼ်ႇတ၊ ၵျွင်းမူၺ်ႇတေႃႇၸၢၼ်း၊ မိူင်းၵိုင်။ ယၢမ်ႈသွၼ်ႁဵၼ်းလိၵ်ႈမႃး တီႈၵျွင်းၼၢမ်ႇမိူင်း မိူင်းၵိုင်၊ ၵျွင်းပိတၵၢတ်ႈ ဝဵင်းပၢင်လူင်၊ ၵျွင်းထီးလိၼ်း ၺွင်ႇၵၢၼ်ႇသူၺ်ႇယႄးသွင်ႇ၊ ထမ်ႇမိၵႃႇရႃႇမတႅၵ်ႉ ဝဵင်းလိူဝ်ႇ။ ၽၢႆႇလွင်ႈသွၼ်ဢၢၼ်ႇလိၵ်ႈ ႁေႃးတြႃး ၵတ်ႉၶႅၼ်ႇလႅၼ်ႇၽၢႆလႄႈ ပီ 1332 ၼီႈ သြႃႇၸဝ်ႈလူင် ပိင်ႇၺႃႇၽေႃးၵ တၢင်ႇပဵၼ်ၸဝ်ႈၶူး လႄႈ ထမ်ႇမၵထိၵ။ လႆႈႁဵတ်းၵၢၼ် ၸဝ်ႈၼႃႈၵျွင်းပိတၵၢတ်ႈ ဝဵင်းပၢင်လူင် 20 ပီ။ လႆႈပဵၼ် ဢုၵ်ႉၵထ ၼႂ်းပႃလိပထမပျၢၼ်ႇ ၵျီးၵျၢပ်ႉယႄး ဝဵင်းပၢင်လူင်တင်းႁိုင်။ လႆႈပဵၼ် ၵႅမ်ၽူႈမၢႆ ၼႂ်းပၢင်ပွႆးၶူၼ်ႉၶႆႈ တႅမ်ႈတွပ်ႇလိၵ်ႈ ပရိယတ်တိသတ်ꩪမ်မပႃလ ၵႅၼ်ႇၸဝ်ႈၸိုင်ႈတႆး ဝဵင်းပၢင်လူင် ပီယၢဝ်းၶၢဝ်းႁိုင်။ လႆႈပဵၼ် ဢေႃဝႃၻႃၸရိယ ၼႂ်းတိူၵ်ႈၵမ်ႇမထၢၼ်း မိၼ်းၵုၼ်း ႁၢၼ်ႉတေႃႇမိူဝ်ႈလဵဝ်။ လႆႈၵႂႃႇယူႇတီႈဝတ်ႉ လွႆတိုင်ၶမ်း မူႇၸေႈသေ ပိုၼ်ၽႄမဵတ်ႉတႃႇတြႃး တီႈတၵႃႇသတ်ႈထႃး မူႇၸေႈ ၼမ်ႉၶမ်း ၶၢဝ်းတၢင်း သီႇပီယဝ်ႉ။

မိူဝ်ႈလဵဝ် မၼ်းၸဝ်ႈ လူလွမ်ပႂ်ႉပႃး ၽြႃးလူင်မူၺ်ႇတေႃႇ မိူင်းၵိုင်သေ ပဵၼ်ဢုၵ်ႉၵထ သင်ႇၶၼႃႇယၵ ၸေႈဝဵင်း ၼႂ်းၸေႈဝဵင်းမိူင်းၵိုင်ၼၼ်ႉယူႇယဝ်ႉ။