ၸဝ်ႈသြႃႇလူင် ဝိပသ်သၼ (ထမ်မၵထိၵပႁုၸၼႁိတထရ) ၽူႈမၢႆလူင် မၢႆ(4)၊ ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး၊ ဝတ်ႉပိတၵၢတ်ႈတႆး၊ ဝဵင်းတူၼ်ႈတီး

ၸဝ်ႈသြႃႇၼႆႉ ၵိူတ်ႇမႃးမိူဝ်ႈပီ 1283-ၼီႈ လိူၼ်ၵမ်လွင်ႈ (13)ၶမ်ႈ ဝတ်းပုတ်ႉ (25.1.1922) တီႈ ဝၢၼ်ႈႁၢႆးသႅင်၊ ဢိူင်ႇမိူင်းယၢႆး၊ ဝဵင်းမိူင်းၼွင်ၼၼ်ႉယဝ်ႉ၊ ပေႃႈမႄႈၸဝ်ႈပဵၼ် လုင်းတေႇဝိၼ်ႇ+ပႃႈၵျွင်းဢူႉ။

မၼ်းၸဝ်ႈ ပဵၼ်သၢင်ႇ မိူဝ်ႈပီ 1399-ၼီႈ ပဵၼ်ၸၢင်း မိူဝ်ႈ 1307-ၼီႈ ၊ ယၢမ်ႈသွၼ်ႁဵၼ်းလိၵ်ႈ တီႈၵျွင်းႁိၼ်ႁေႈ မိူင်းယၢႆး၊ ၵျွင်းဝၢၼ်ႈၼႃး မိူင်းၼၢင်း၊ ဝတ်ႉမႁႃႇ ဝိသုတ်ႉထႃႇရုင်ႇ ဝဵင်းမေႇမျဵဝ်ႉ၊ ၵျွင်းယွတ်ႈ ဝဵင်းၵျွၵ်ႉမႄး၊ ၵျွင်းဢၽႃႇယႃႇရႃႇသူၺ်ႇၵူႇ ဝဵင်းတႃႈလိူဝ်ႇ၊ ဝတ်ႉၵေႇလဝမၢၼ်ႇဢွင်ႇ ဝဵင်းၵူတ်ႉၶၢႆ။

ပီ 1318-ၼီႈ မႃးၼင်ႈၵျွင်းလူင် မိူင်းၼၢင်းသေ တေႇၽုၺ်ႇ တိူၵ်ႈသွၼ်လိၵ်ႈ၊ ပီ 1319-ၼီႈ တင်းၸဝ်ႈသြႃႇ မိူင်းၼွင်လႄႈ ၸဝ်ႈသြႃႇသေႃၽၼ မိူင်းၼွင် သၢမ်တူၼ်ႁူမ်ႈၵၼ်သေ ပိုတ်ႇၽုၺ်ႇ “ပၢင်ပွႆးၶူၼ်ႉၶႆႈတႅမ်ႈတွပ်ႇလိၵ်ႈ ဝိၼယႃႇၼုၵ်ႉၵႁ “ မိူင်းၼၢင်း၊ ပီ1328 ၼီႈ မိူဝ်းႁဵၼ်းဢဝ်ၵမ်ႇမထၢၼ်း တမ်ႈတီႈၸဝ်ႈသြႃႇလူင် ဢႃႇလေႃးၵ သဵၼ်ႈဝီ၊ ပီ 1329 ၼီႈ သြႃႇၸဝ်ႈလူင် မႁႃႇၼႃႇယၵ ႁွင်ႉၸဝ်ႈမႃးႁဵတ်း ၽူႈထတ်းလိၵ်ႈ ပိတၵၢတ်ႈတႆး။
ပီ 1331- 1333- ၼီႈ သြႃႇၸဝ်ႈလူင်ႇမႁႃႇၼႃႇယၵ မိူင်းသူႈဢမ်ႇပေႃးယူႇလီ လႄႈ ၸဝ်ႈႁဝ်း လႆႈလုမ်းလႃးႁဵတ်းဝေႇယႃႇဝဵတ်ႉၸမၼ်းၸဝ်ႈ တီႈပၢင်လူင်၊ ပီ 1333 ၼီႈ လိူၼ်(11)မူၼ်း ၼၼ်ႉ လႆႈပၢင်း ဢဝ်သြႃႇၸဝ်ႈလူင်ပၺ်ၺႃႇၽေႃးၵ လူင်းၵႂႃႇၶိုၼ်ႈႁူင်းယႃလူင် “မျႃႉရတၼႃႇ” တႃႈၵုင်ႈ။ လိူၼ် (11) လပ်း မႃး သြႃႇၸဝ်ႈလူင်ပၺ်ၺႃႇၽေႃးၵ ႁပ်ႉမိူင်းၾႃႉ လႃႇမိူင်းလုမ်ႈၵႂႃႇ လႄႈ လိူၼ် (12) မႂ်ႇ (6)ၶမ်ႈၼၼ်ႉ ၶိုၼ်း ပၢင်းဢဝ်ရုပ်ႈၵလၢပ်ႈၶၢပ်ႈတူဝ်ၸဝ်ႈ တၢင်ႇႁိူဝ်းဝိၼ် တီႈမင်ႇၵလႃႇတူင်ႇ မႃးလူင်းတီႈ ဝဵင်းၼမ်ႉၸၢင် သိုပ်ႇ တၢင်းၵႃး ပၢင်းမႃးပၢင်လူင် သေ မိူဝ်ႈပီ 1334-ၼီႈ လႆႈဢွၼ်ႁူဝ်လုမ်လႃးသၢင်းၵျူဝ်ႇ သြႃႇၸဝ်ႈလူင် မိူင်းသူႈယဝ်ႉ။
ပီ 1334-ၼီႈ တင်ႈၸဝ်ႈသြႃႇ ၵိတ်ႉတိသႃႇရ လၢင်းၶိူဝ်း လႆႈၵႂႃႇႁဵတ်းၵၢၼ်သႃႇသၼႃႇၼႂ်းမိူင်း ၵမ်ႇပေႃးတီးယႃး တီႈပေႃးထိမႃးရၢမ်းဝတ်ႉၽႃးႁိ။ ပီ 1338 -ၼီႈ မႃးမိူင်းတႆးၶိုၼ်း။
ပီ 1341- ၼီႈ တင်ႈၸဝ်ႈသြႃႇလူင်မိူင်းၼွင် တေႇတင်ႈ ဝတ်ႉပိတၵၢတ်ႈတႆး ဝဵင်းတူၼ်ႈတီး၊ မၼ်းၸဝ်ႈ လႆႈႁပ်ႉမိူင်းၾႃႉ ယႃႇမိူင်းလုမ်ႈ မိူဝ်ႈပီ 2005 ယဝ်ႉ။
ပပ်ႉလိၵ်ႈ ဢၼ်မၼ်းၸဝ်ႈ တႅမ်ႈဝႆႉ မီး 12 ပပ်ႉပၢႆယဝ်ႉ။