ၸဝ်ႈသြႃႇလူင် သေႃၽိတ (ဢၷ်ၷမႁႃပꧣ်တိတ)

ၽူႈမၢႆလူင် မၢႆ(2) ငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈတႆး ဝတ်ႉမင်ႇၵလႃႇမူၺ်ႇတေႃႇ ဝဵင်းပၢင်လူင်

ၸဝ်ႈသြႃႇလူင်ၼႆႉ ပေႃႈမႄႈၸဝ်ႈ ၸိုဝ်ႈဝႃႈ လုင်းၵျွင်းသၢမ်+ပႃႈၵျွင်းမိင်ႈ၊ ၵိူတ်ႇမႃးမိူဝ်ႈပီ ၵေႃးၸႃႇ 1294-ၼီႈ လိူၼ်ႁႃႈလွင်ႈ (5)ၶမ်ႈ ဝၼ်းသုၵ်း၊ တီႈဝၢၼ်ႈသၢႆးၶၢဝ် ဝဵင်းၵုၼ်ႁဵင် ၊ ၸိုဝ်ႈမိူဝ်ႈလဵၵ်ႉႁွင်ႉဝႃႈ ၸၢႆးသႃႇ ၼႆယဝ်ႉ။ ပဵၼ်သၢင်ႇ မိူဝ်ႈပီၵေႃးၸႃႇ 1307-ၼီႈ ပဵၼ်ၸၢင်း မိူဝ်ႈ 1316-ၼီႈ ၊ မၼ်းၸဝ်ႈယၢမ်ႈသွၼ်ႁဵၼ်း မႃးတီႈၵျွင်းသၢႆးၶဝ် ဝဵင်းၵုၼ်ႁဵင်၊ ၵျွင်းပိတၵၢတ်ႈ ၵျွင်းမူၺ်ႇတေႃႇ ဝဵင်းပၢင်လူင်။

ပီ 1328-ၼီႈ တေႃႇ ပီ1332-ၼီႈ ၼႂ်းၶၢဝ်းတၢင်း(4)ပီ လႆႈႁပ်ႉဢဝ်ပုၼ်ႈၽွၼ်းၽူႈမၢႆလူင် ငဝ်ႈ ငုၼ်းမုၵ်ႉၸုမ်းလူင်သင်ႇၶၸိုင်ႈတႆး ။ တႄႇပီ 1365-ၼီႈမႃး တေႃႇမိူဝ်ႈလဵဝ်လႆႈပဵၼ် ဢၼုၼႃႇယၵငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈ တႆး၊ တီႈပၢင်ပွႆးတႅမ်ႈတွပ်ႇ/ၶူၼ်ၶႆႈလိၵ်ႈ ပရိယတ်ႉတိသတ်ႉထမ်ႇမပႃႇလၵႅၼ်ႇၸဝ်ႈၸိုင်ႈတႆး ဝဵင်းပၢင်လူင် တႄႇဢဝ်ပွၵ်ႈၵမ်း (1)၊ မိူဝ်ႈပီ 1320 -ၼီႈမႃး တေႃႇပီ 1343-ၼီႈ လႆႈႁပ်ႉဢဝ်ပုၼ်ႈၽွၼ်း ၽူႈမၢႆလူင် ၵူႈ လွင်ႈꧦ ၊ တႄႇဢဝ်ပီ 1344-ၼီႈ မႃးတေႃႇ မိူဝ်ႈလဵဝ်၊ ပီ 1369-ၼီႈၼႆႉ လႆႈႁပ်ႉဢဝ်ပုၼ်ႈၽွၼ်း ၼႃႈၵၢၼ်ႁူဝ် ပဝ်ႈလူင် ပၢင်ပွႆးတႅမ်ႈတွပ်ႇ/ၶူၼ်ႉၶႆႈလိၵ်ႈ ဝဵင်းပၢင်လူင်။ ပီ 1342-ၼီႈ လႆႈပဵၼ်သင်ႇၶၼႃႇယၵၼႂ်းမိူင်းတႆး၊ ပီ 1350-ၼီႈ လႆႈပဵၼ်ၽူႈၶဝ်ႈပႃးၽၢႆႇႁၢပ်ႇ ၵၢၼ်ငဝ်ႈငုၼ်းသင်ႇၶႃႇၸိုင်ႈမိူင်း၊ ၼႂ်းပီၼႆႉၵူၺ်းၼင်ႇၵဝ်ႇ လႆႈပဵၼ်သင်ႇၶ မႁႃႇၼႃႇယၵၸိုင်ႈမိူင်း။

သြႃႇၸဝ်ႈႁဝ်းၼႆႉ ပီ 1353-ၼီႈ လႆႈ “ဢၷ်ၷမႁႃၵၼ်ꩪဝႃꩡၵပၼ်တိတ” ၊ ပီ1354-ၼီႈ လႆႈ “ဢၷ်ၵမႁႃပၼ်တိတ”။ ယၢမ်းလဵဝ် သြႃႇၸဝ်ႈလူင်ႁဝ်းၼႆႉ တိုၵ်ႉႁၢပ်ႇႁၢမ်ဝႆႉ ၼႃႈၵၢၼ်ၽႃႇသႃႇ သႃႇသၼႃႇ ပဵၼ်ပထႃႇၼႃႇ ယၵ တီႈဝတ်ႉမင်ႇၵလႃႇ မူၺ်ႇတေႃႇ ဝဵင်းပၢင်လူင်သေ ၽွင်းငၢမ်းသင်ႇသွၼ်ပၼ် ၼိူဝ်လုၵ်ႈၼွင်ႉတပေး (100)ပၢႆ ဢိၵ်ႇၼိူဝ်တၵ်ႃႇတင်းလၢႆယူႇယဝ်ႉ။